Аса қауіпті инфекциялардың алдын алу шаралары түсіндірілді

Ақтөбе облыстық ЖИТС орталығында орталықтың медицина қызметкерлерінің қатысуымен «Аса қауіпті және карантиндік жұқпалы аурулардың (оба, тырысқақ) алдын алу» тақырыбында семинар өтті. Семинарды Ақтөбе обаға қарсы станциясының қызметкерлері өткізді.

- «Аса қауіпті инфекциялар бойынша санитариялық-эпидемияға қарсы іс-шараларды ұйымдастыруға және өткізуге қойылатын талаптар орындалуы тиіс. ЖИТС орталығының әрбір дәрігері жедел жоспар мен хабарлау схемасына сәйкес аса қауіпті және карантиндік инфекцияларға күдікті науқас тіркелген жағдайда профилактикалық және санитариялық-эпидемияға қарсы іс-шаралардың толық көлемін жүргізе отырып, қажетті медициналық көмек көрсету қағидаларын білуі тиіс», - деді Ақтөбе облыстық ЖИТС орталығының эпидемиологиялық бөлімінің меңгерушісі Самат Мұртазин.

Семинарда емдеу-профилактикалық мекемеде аса қауіпті және карантиндік инфекциялар тіркелген жағдайда шұғыл әрекет ету жоспары түсіндірілді. 1 типті обаға қарсы қорғаныс киімдерін кию тәсілдері көрсетілген. 

- «Алдымен адамның температурасы көтеріледі. Орталық жүйке жүйесі зардап шегеді. Медицина қызметкерлері аса қауіпті инфекциялар ауруының бастапқы белгілері туралы білуі тиіс» - деп атап өтті Ақтөбе обаға қарсы станциясының өкілі Бақытбек Таубаев.